दमक, १५ भदाैं । इलामको चुलाचुली गाउँपालिकाले सशस्त्र युद्धमा मारिएका सहिदहरुको सम्मानमा सहिद स्मृति पार्क निर्माण गर्ने भएको छ । पार्क भित्र सहिदहरुका अर्धकदका शालिक निर्माण गरिनेछ ।

गाउँपालिका अध्यक्ष राजेन्द्र केरुङले दश बर्षे सशस्त्र युद्ध र सो पछिको समेत अधिकार प्राप्तीको आन्दोलनमा मारिएका सहिदहरुको सम्मानका लागि सहिद स्मृति पार्क निर्माणसहित सहिद तथा वेपत्ता परिवार लक्षित बजेटसहितका कार्यक्रमहरु अघि सार्नु भएको हो ।

अध्यक्ष केरुङले चालू आर्थिक बर्ष २०८२/०८३ को बार्षिक नीति कार्यक्रममानै समावेश गरि अघि सारिएको सो कार्य अघि बढाउन कार्यपालिका सदस्य नरेन्द्रकुमार वान्तवाको संयोजकत्वमा गंगा सुवेदी, पदमा कुरुङवाङ र बिसु कुलुङ सदस्य रहेको समितिलाई जिम्मेवारी दिइएको बताउनु भयो । सो सम्बन्धमा कार्यपालिका बैठकले आवश्यक निर्णय गरेको जनाउँदै अध्यक्ष केरुङले भन्नु भयो– राज्यले घोषणा गरेका सहिदहरु साझा हुन् हामीले सहिदलाई सदास्मरण गर्नेछौं ।

उहाँका अनुसार चुलाचुली गाउँपालिका भित्र राज्यबाट घोषणा गरिएको सहिदहरुको संख्या १३ जना रहेको प्रारम्भिक जानकारी आएको छ ।
यो तथ्याङकमा कोही पनि नछुटुन भन्ने उद्धेश्यले वान्तवाको संयोजकत्वमा रहेको समितिले तथ्याङक यकिन गर्ने र उनीहरुको अवस्थाका बारेमा पनि अधययन गरि स्थानीय सरकारबाट सहिद तथा वेपत्ता परिवारका लागि गर्नुपर्ने कामबारे पनि सुझाव दिनेछ ।

शालिक बनाएर मात्रै सहिद प्रति सम्मान नहुने आफ्नो निष्कर्ष सुनाउँदै अध्यक्ष केरुङले सहिद तथा वेपत्ता प्रत्येक परिवारको निःशुल्क स्वास्थ्य बीमा गाउँपालिकालेनै गरिदिने , पालिका भित्रका स्वास्थ्य संस्था, अस्पताल, क्लिनिकहरुमा र एम्बुलेन्स सेवा समेत निशुल्क गरिदिने बताउनु भयो । स्वास्थ्यसँगै शिक्षा र व्यवसायका क्षेत्रमा पनि सहिद तथा वेपत्ता परिवारलाई राहत तथा सहयोगका कार्यक्रमहरु ल्याइएको गाउँपालिकाले जनाएको छ ।

गाउँपालिका अध्यक्ष केरुङका अनुसार सहिद परिवारका बालबालिकालाई कक्षा ११/ १२ सम्म निःशुल्क पढाइदिने र सो भन्दा माथि समेत चाहेको बिषयमा अध्ययनका लागि छात्रवृत्तिको व्यवस्था गरिदिने, सहिद परिवारले आवश्यक ठानेमा तत्काल कम्तीमा एक जनालाई रोजगारको व्यवस्था मिलाइने र उद्यम, व्यवसाय सञ्चालन गर्न चाहने सहिद परिवारलाई आर्थिक क्षेत्रमा समेत प्रोत्साहन गरिने गाउँपालिकाको योजना रहेको अध्यक्ष केरुङले बताउनु भयो ।

देशभरमै एक मात्रै त्यस किसिमको सशस्त्र द्धन्द्धका सहिदको स्मृति पार्क बनाउने र एकमुष्ट सम्बोधन हुने किसिमको सहयोग तथा राहतका कार्यक्रमहरु ल्याउने चुलाचुली गाउँपालिकानै पहिलो भएको अध्यक्ष केरुङको दाबी छ । उहाँले आगामी बैशाख सम्ममा सो स्मृति पार्कको उदघाटन तथा सहिद परिवारको सामुहिक सम्मानको कार्यक्रम राष्ट्रपति रामचन्द्र पौडेलको प्रमुख उपस्थितीमा गर्ने घोषणा पनि गर्नुभएको छ ।