ललितपुर, १८ भदाैं । पाँचथरका क्यानसर पीडित अग्रज पत्रकार कविन्द्र सेर्माको उपचारको लागि प्रवासी नेपालीहरुले सहयोग गरेका छन् । सेर्माको उपचारको लागि मलेसिया र पोल्याण्डका नेपालीहरुले १ लाख ५८ हजार ७७९ रुपैयाँ आर्थिक सहयोग गरेका हुन् ।

मंगलवार कुम्मायक गाउँपालिका यासोकमा पत्रकार सेर्माका भाई कमल सेर्मालाई सहयोग रकम हस्तान्त्रण गरिएको वताइएकाे छ ।

माङजाबुङ् प्रवास मलेसियाबाट समाजसेवी अर्जुन लावतीको समन्वयमा १ लाख १ हजार २२२ रुपैयाँ संकलन भएको थियो भने पोल्याण्डबाट दिपाल र दिपेन्द्र लावतीको अगुवाईमा ५७ हजार ५५७ रुपैयाँ संकलन गरिएको  जनाइएकाे छ ।

पालिका अध्यक्ष वंमप्रसाद लावती र वडा नं. १ का वडाअध्यक्ष देबेन्द्रकुमार लावतीले पत्रकार सेर्माका भाइलाई संयुक्त रूपमा हस्तान्त्रण गरिएको थियो ।

पाँचथरलाइ कार्यक्षेत्र बनाएर लामाे समयदेखि पत्रकारिता गरिरहनु भएका अग्रज पत्रकार सेर्मा विगत लामो समयदेखि क्यानसर रोगबाट पीडित छन् । कमजोर आर्थिक अवस्थाका वावजुद दाताको सहयोगबाट उपचार गर्दै आउनुभएका सेर्माले सामाजिक संजाल लगायत विभिन्न माध्यमबाट सहयोगको अपिल गर्दै आउनु भएको छ । उहाँको भक्तपुर क्यान्सर अस्पताल काठमाडौंमा उपचार  हुदै आएकोमा हाल थप उपचार भारतमा भइरहेकाे छ  ।