दमक,५ पुस । मोरङका शसक्त पहिचानवादी युवा नेता मिक्सन मिभक संघीय लिम्बुवान प्रान्तीय मञ्च मोरङको छैटौँ अधिवेशनबाट अध्यक्षमा निर्वाचित भएका छन् !

मोरङको उर्लाबारीमा सम्पन्न अधिवेशनले मिभकको अध्यक्षतामा २१ सदस्यीय नयाँ जिल्ला कार्यसमिति चयन गरेको हो ।

नवनिर्वाचित समितिमा रामकुमार खुदाङ वरिष्ठ उपाध्यक्ष, शेरबहादुर तुम्बाहाम्फे, जीतबहादुर लिम्बू र राजेश हुक्पा चोङबा उपाध्यक्ष, अशोककुमार नाल्बो सचिव, खिलबहादुर खड्का सह–सचिव तथा चन्द्र पालुङवा कोषाध्यक्षमा चयन भएका छन्।

मञ्चका अध्यक्ष कुमार लिङ्देनको उपस्थितिमा सम्पन्न कार्यक्रममा पार्टीका प्रदेश तथा केन्द्रीय तहका नेताहरू, प्रतिनिधि तथा कार्यकर्ताहरूको उल्लेख्य उपस्थिति रहेको थियो। अधिवेशनमा सांगठनिक प्रतिवेदन, भावी कार्यदिशा, सदस्य विस्तार तथा स्थानीय राजनीतिक मुद्दाहरूमाथि छलफल गरिएको आयोजकले जनाएको छ।