“हामी हाम्रो पहिचान र अस्तित्वका लागि एक होऔँ” भन्ने मूल नारासहित आयोजना हुन लागेको उक्त समारोहमा संस्थाको विगत २५ वर्षे गौरवपूर्ण यात्रा, महत्वपूर्ण उपलब्धिहरू, समुदायप्रति पुर्याएको योगदान तथा आगामी योजनाबारे विस्तृत रूपमा समीक्षा गरिनेछ । साथै, दक्षिण कोरियामा रहेका नेपाली समुदायबीच संस्थाले निर्वाह गरेको भूमिका, सामाजिक एकता, सांस्कृतिक संरक्षण तथा पहिचानको प्रवर्द्धनमा खेलेको योगदानबारे पनि विशेष रूपमा चर्चा गरिने कार्यक्रम रहेको छ ।

यसै अवसरमा संस्थाले आफ्नो रजत जयन्तीको स्मरणमा “वसाङ्लुङ” नामक विशेष स्मारिका प्रकाशनको विमोचन गर्ने तयारी गरेको जनाएको छ । उक्त स्मारिकामा संस्थाको स्थापना कालदेखि हालसम्मका गतिविधिहरू, अनुभव, उपलब्धिहरू तथा समुदायका विविध आयामहरू समेटिएको बताइएको छ, जसले संस्थाको इतिहासलाई दस्तावेजीकरण गर्ने विश्वास लिइएको छ ।

कार्यक्रममा विविध सांस्कृतिक प्रस्तुति, परम्परागत च्याब्रुङ “के” नाच, सामुदायिक अन्तरक्रिया तथा शुभकामना आदानप्रदानका विशेष कार्यक्रमहरू समेत समावेश गरिनेछन् । यसले नेपाली समुदायबीच आपसी सद्भाव, सहकार्य, भाइचारा र एकतालाई अझ मजबुत बनाउने अपेक्षा गरिएको आयोजकले जनाएको छ ।

संस्थाले दक्षिण कोरियामा रहेका सम्पूर्ण नेपाली दाजुभाइ तथा दिदीबहिनीहरूलाई कार्यक्रममा सक्रिय सहभागिता जनाई समारोहलाई सफल बनाउन हार्दिक अनुरोध गरेको छ । साथै, यस कार्यक्रमले प्रवासमा रहेका नेपालीहरूलाई आफ्नो भाषा, संस्कृति, परम्परा र पहिचानसँग अझ नजिक ल्याउने तथा भावनात्मक सम्बन्ध सुदृढ गर्ने महत्वपूर्ण अवसर प्रदान गर्ने विश्वास गरिएको छ ।