ललितपुर, ताप्लेजुङस्थित धार्मिक तथा सांस्कृतिक आस्थाको केन्द्र मुक्कुमलुङमा निर्माण गर्न लागिएको केवलकार परियोजनाको विरोधमा काठमाडौँको माइतीघरमा विरोध प्रदर्शन गरिएको छ ।

याक्थुङ (लिम्बु) समुदायको आस्थाको धरोधर मास्न पाइदैन भन्दै आदिवासी जनजाति महासंघ, किरात याक्थुङ चुम्लुङ तथा प्रकृतिप्रेमी अभियन्ताहरूले केवलकार निर्माणले मुक्कुमलुङको मुन्धुमी शक्तिपीठ र प्राकृतिक संवेदनशीलता नष्ट गर्ने भन्दै तत्काल निर्माण रोक्न माग गर्दै प्रदर्शन गरेका हुन् ।

प्रदर्शनकारीहरूले ‘मुक्कुमलुङ बचाउ अभियान’ मार्फत आफ्ना मागहरू अघि सारेका छन् । उनीहरूले मुक्कुमलुङ याक्थुङ (लिम्बू) जाति र किरात धर्मावलम्बीको पवित्र मुन्धुमी स्थल भएकाले यसको मौलिकता मास्न नहुने र केवलकार बनाउँदा हजारौँ रुख काटिने भएकाले स्थानीय जैविक विविधतामा असर पर्ने भन्दै चिन्ता व्यक्त गरेका छन् ।

प्रदर्शनकारीहरूले हातमा प्लेकार्ड र ब्यानर बोकेका छन् । उनीहरूले ‘हाम्रो मुक्कुमलुङ, हाम्रो पहिचान’, ‘केवलकार चाहिँदैन, मुक्कुमलुङ मास्न पाइँदैन’ जस्ता नाराहरू लेखिएका प्लेकार्डहरु बोकेका थिए ।

ताप्लेजुङमा केबलकार निर्माणको तयारी तीव्र पारिएसँगै काठमाडौँ र स्थानीय स्तरमा विरोधका स्वर बढ्दै गएका छन् । बर्षौदेखि केवलकार निर्माणको विरुद्ध चरणबद्ध आन्दोलन गरिरहेका प्रदर्शनकारीहरूले बालेन सरकारको नयाँ नेतृत्वको सरकारले हाम्रो मुद्दा सम्बोधन नगरेमा अझ सशक्त आन्दोलन गर्ने चेतावनी दिएका छन् ।