धरान, २ साउन । सुनसरीको धरानस्थित लिम्बुवानको ऐतिहासिक राजधानी विजयपुरमा बृहत सरसफाई कार्यक्रम सम्पन्न भएको छ । शनिबार विजयपुर दरबार परिसर संरक्षण संघर्ष समितिको आयोजनामा बृहत सरसफाई कार्यक्रम आयोजना गरिएको हो । कार्यक्रममा काङसाेरे फाेर्सकाे समेत सहभागीता रहेकाे थियाे ।
सुनसरी, मोरङ, झापा, धनकुटा लगायतबाट हजारौंको संख्यामा ऐतिहासिक दरबार परिसर सरसफाई गरिएको सरसफाई आयोजकका एक सदस्यले लिम्बुवान खबरलाई बताए ।
धरान खानेपानी आयोजनाले पानी ट्यांकी निर्माण गर्ने भनी विजयपुर अतिक्रमण भएपछि यस क्षेत्रलाई संरक्षण गर्नुपर्ने भनी याक्थुङ समुदाय दसकौंदेखि आन्दोलित छन् । किरात याक्थुङ चुम्लुङ, विभिन्न सामाजिक संघसंस्था, पहिचान पक्षधर राजनैतिक पार्टीहरु, स्वतन्त्र नागरिक समाज, बुद्धिजिवी लगायतले लिम्बुवानको राजधानी विजयपुर एक ऐतिहासिक पुरातात्विक क्षेत्र भएको हुँदा यसको संरक्षण गर्नु पर्नेमा जोड दिएका छन् ।

याक्थुङ समुदायले ऐतिहासिक विजयपुर दरबार लिम्बुवानको राजधानी भएको हुँदा ऐतिहासिक र पुरातात्विक भएको हुँदा राज्यले यसलाई संरक्षण गर्नुपर्नेमा संरक्षण समितिले जनाएको छ ।
विजयपुर दरबार परिसरको मूल क्षेत्रमा सांस्कृतिक अतिक्रमण तत्काल हटाउन सम्बन्धित पक्षलाई आग्रह गरेको छ । आयोजक संरक्षण समितिले सम्मानित सर्वोच्च अदालतको निर्णयहरुको अक्षरस पालना गर्न समेत सम्बन्धित पक्षलाई अनुरोध गरेको छ । त्यसैगरी परिसरमा निर्माण भएको सांस्कृतिक संरचना नहटेसम्म परिसरकै क्षेत्रमा पर्ने सुलिकोट मुनिको चिल्लो डाँडा÷चिण्डे डाँडामा बन्न लागेको सुम्निामा पारुहाङ परियोजनालाई स्थगन गर्नसमेत आग्रह गरेको छ ।