काठमाडौं, २८ साउन । नेपाल पत्रकार महासंघले जनआस्था पत्रिकाका सम्पादक बरिष्ठ पत्रकार किशोर श्रेष्ठको रिहाइको माग गर्दै आज काठमाडौं प्रहरी परिसर अगाडि धर्ना दिएको छ ।

महासंघले धर्नामा सहभागी हुन प्रेस स्वतन्त्रता पक्षधर सबै पत्रकारलाई आह्वान गरेको छ । महासंघका महासचिव रामप्रसाद दाहालले सूचना जारी गर्दै धर्नाका लागि आवहन गरेका हुन् ।

बुधबार नेपाल प्रहरीले बरिष्ठ पत्रकार श्रेष्ठलाई पक्राउ गरेको थियो । आज बिहानै प्रहरी टोलीले जनआस्थाको कार्यालयमा समेत खानतलासी गरेपछि पत्रकार झन आक्रोसित बनेका छन् ।

महासंघले श्रेष्ठको पक्राउ र जनआस्थामा गरिएको खानतलासीको विरोध गर्दै प्रदशन् गरेका हुन् । महासंघका अध्यक्ष निर्मला शर्मा सहितको पत्रकारहरुको एक टोलीले बुधबार राति नै जिल्ला प्रहरी कार्यालय काठमाडौं परिसर अगाडि प्रदर्शन गरेको थियो ।

श्रेष्ठलाई विनासर्त रिहा नगरे कडा आन्दोलन गर्ने चेतावनी महासंघले दिएको छ । प्रहरीले पत्रकार श्रेष्ठविरुद्ध वैयक्तिक गोपनीयतासम्बन्धी ऐन, २०७५ विपरीतको कसुर गरेको आरोपमा पक्राउ गरिएको र अनुसन्धान भइरहेको जनाएको छ ।

विश्व प्रेस काउन्सिलका वरिष्ठ उपाध्यक्षसमेत रहेका श्रेष्ठ प्रेस काउन्सिल नेपालका पूर्व अध्यक्ष एवम् नेपाल पत्रकार महासंघका पूर्व महासचिव हुन् । खोजी पत्रकारितामा छुट्टै पहिचान बनाएका उनी खरो र निर्भिक पत्रकारका रूपमा परिचित छन् ।

पत्रकारहरुको नियमक प्रेस काउन्सिल मार्फत नियमन नगरी अभिव्यक्ति तथा प्रेस स्वतन्त्रताको हनन् गर्दै अपराधी शैलीमा प्रहरीले  श्रेष्ठको गिरफ्तारी गरेकोमा पत्रकारहरु आक्रोसित बनेका छन् ।