लिम्बुवानखबर। नेपाली सांगीतिक आकाशका धरोहर बरिष्ठ गायक तथा संगीतकार प्रेमध्वज प्रधानको आज दिउँसो निधन भएको छ । गायक प्रधानको सुन्धारास्थित काठमाडौं न्यूरो एण्ड जनरल अस्पतालमा उपचारका क्रममा निधन भएको हो ।
पारिवारिक स्रोतका अनुसार ८४ वर्षीय प्रधानलाई छातीमा समस्या देखिएपछि केही दिन अघि सो अस्पतालमा भर्ना गरिएको थियो ।
‘गोल्डेन भ्वाइस’ उपनामले ख्याती कमाएका प्रधानको जन्म १९९४ सालमा सिन्धुपाल्चोकको चौतारामा भएको थियो ।
१६ वर्षकै उमेरमा ‘याद कसैको आइरहन्छ यो अन्धेरी रातमा’ बोलको गीत रेकर्ड गराएका प्रधानले ‘यो नेपाली शिर उचाली’, ‘पर लैजाऊ फूलहरु’, ‘घुम्तीमा नआऊ है’, ‘गोरेटो त्यो गाउँको’, ‘तिमीलाई अचेल कहाँ भेटौं’ लगायतका दर्जनौं चर्चित गीतहरु गाएका छन् ।
चलचित्र ‘माइतीघर’ले नेपाली चलचित्रको ‘नमान लाज यस्तरी’ बोलको गीतका गायक प्रधान विदेशीसँग पहिलो गीत गाउने गायक बन्न पुगेका थिए । प्रधानले सो गीत उषा मङ्गेश्करसँग गाएका थिए । नेपाली सांगीतिक आकाशका धरोहर प्रधानको निधनले सिंगो देश शोक मग्न भएको छ ।
Related