काठमाडौं, ६ असार । चलचित्र विकास बोर्डमा ६ जनाले अध्यक्ष पदका लागि आवेदन दिएका दिएका छन् । संचार मन्त्रालय समन्वय शाखाले शनिबार ६ जनाको आवेदन परेको जनाएको छ । त्यसैगरी मन्त्रालयले आज आइतबारसम्म आवेदन दिन सक्ने जनाएको छ ।

चलचित्र विकास बोर्डको अध्यक्षका लागि अभिनेता भुवन केसी, निर्देशक सम्झना उप्रेती रौनियार, अरुणकुमार प्रधान, निर्माता सुशील पोखरेल, निर्माता तथा अभिनेत्री सुस्मा कार्की लगायतले आवेदन दिएका छन् ।

आवेदन दिने अधिकांश आवेदक अध्यक्षका प्रत्यासीहरु सत्तारुढ दल कांग्रेस निकट फिल्मकर्मी हुन् । उनीहरुले शक्तिकेन्द्रसँग लबिङ गरिरहेको बताइएको छ ।

असार ५ गते सूचना प्रकाशित गर्दै मन्त्रालयले ३० वर्ष पुरा भई ६५ वर्ष ननाघेको हुनुपर्ने, स्नातक उत्तिर्ण गरी फिल्ममा १० वर्ष काम गरेको हुनुपर्ने वा प्रवीणता प्रमाणपत्र तह पास गरी फिल्म क्षेत्रमा २० वर्ष कार्य गरेको हुनुपर्ने मापदण्ड राखेर अध्यक्षमा आवेदन दिन सुचना जारी गरेको थियो ।