काठमाण्डौ। सरकारले विभिन्न फर्महरुसँग मल खरिद गर्न अनुरोध गरिएता पनि जनताले सर्वसुलभ रुपमा मल खरिद गर्न नपाएपछि बङ्गलादेशसँग मल खरिदको सम्झौता गर्न नेपाली टोली आज बङ्गलादेश जाने भएको छ ।

करिब ५० हजार मेट्रिक टन रासायनिक मल खरीद गर्ने सम्झौता गर्न नेपाल सरकारको टोली गएको हो । नेपाल र बंगलादेश सरकार बीच (जीटुजी) मार्फत मल खरिदका लागि समझदारी गर्न नेपाली टोली गएकोको कृषि सामग्री कम्पनी लिमिटेडका प्रवक्ता विष्णु प्रसाद पोखरेलले जानकारी दिएका छन् ।

उक्त टोलीमा कृषि मन्त्रालयका सह–सचिव कञ्चनराज पाण्डे, कृषि सामग्री कम्पनीका प्रवक्ता विष्णुप्रसाद पोखरेल र मन्त्रालयका कृषि प्रसार अधिकृत अरुण जिसी रहनुभएको छ । बंगलादेशसँग मल ल्याउने सम्झौता भएपछि मात्रै खरिदको अन्तिम मूल्यबारे थाहा हुने कृषि सामग्री कम्पनी लिमिटेडका प्रवक्ता पोखरेलले बताएका छन् ।

वर्तमान परिस्थितिलाई मध्यनजर गर्दै अब उपरान्त मल ल्याउनलाई विवादरहित रूपमा सरकारी मूल्यमा रासायनिक मल खरिद गरेर ल्याइने लिमिटेडका प्रवक्ता बताउनुहुन्छ । कम्पनीले बङ्गलादेशबाट ल्याइने रासायनिक मल ढुवानीका लागि यस अघि नै कम्पनी छनोट गरिसकेको जनाएको छ । ढुवानीका लागि कम्पनीले गएको असोज ३ गते आह्वान गरेको अन्तर्राष्ट्रिय बोलपत्र अनुसार संयुक्त अरब इमिरेट्स (यूएई) को जेन्ट्रेड एफजेडएफ कम्पनी छनोट भइसकेको छ ।

कृषि सामग्री कम्पनी र जेन्ट्रेडबीच भएको सम्झौतामा ६० दिनभित्र मल ल्याइसक्नुपर्ने उल्लेख भए पनि प्रक्रियामा ढिलाइ भएको हुँदा समस्या हुन सक्ने अनुमान गरिएको कम्पनीका अधिकारी बताउँछन् । गत भदौमा दुई देशका सरकार प्रमुखबीच भएको टेलिफोन कुराकानीमा सापटीमा मल ल्याउने मौखिक सहमति भएको थियो ।

यद्यपी बङ्गलादेश सरकारले सुरुवाती चरणमा मल पैँचो दिने भने पनि पछिल्लो समय खरीद गरेर लैजानुपर्ने प्रस्ताव राखेको थियो ।