• लिम्बुवानखबर, २४ जेठ

प्रदेश नम्बर १ संसद्को आठौं तथा बर्खे अधिवेशन आज सुरु हुँदैछ । कोरोना महामारी भन्दै अध्यादेश मार्फत बजेट ल्याउने तयारीमा रहेको प्रदेश १ सरकार विपक्षीहरुको तिव्र दबाबका कारण संसद् अधिवेशन आह्वान गर्न बाध्य बनेको हो ।

आज (सोमबार) दिउँसो दुई बजे बस्ने बैठकमा प्रदेशको नीति कार्यक्रम र बजेट पेश हुनेछ । यसअघि वैशाख ५ मा प्रदेश सभाको सातौं तथा हिउँदे अधिवेशन विपक्षी दलहरुको अवरोधले बीचैमा टुंगिएको थियो । सातौं अधिवेशनको ८ वटा बैठकमा अन्तिम बैठकमा मात्र मुख्यमन्त्री शेरधन राई उपस्थित भएका थिए ।

प्रदेशमा असार १ मा बजेट ल्याउने चलन छ । त्यसको १५ दिन अगावै प्रि–बजेट छलफल सक्नुपर्ने कानुनी प्रबन्ध छ । तर, यसपटक प्रि–बजेट छलफल छोटो अवधिमै सक्ने गरी सरकारले अध्यादेश ल्याएको छ ।

सरकारले अध्यादेशबाट बजेट ल्याउने तयारी सुरु गरेपछि प्रदेशका विपक्षी दलहरुले बिरोध गर्दै संसद्को बजेट अधिवेशन तत्काल बोलाउन माग विज्ञप्ति मार्फत सार्वजनिक रुपमा माग गरेका थिए ।

विपक्षी दलका प्रमुखहरुले प्रदेश प्रमुखलाई भेटेर पनि अधिवेशन बोलाउन आग्रह गरेका थिए । यस लगत्तै मुख्यमन्त्री शेरधन राईले सर्वदलीय बैठक राखेर बजेट संसद्बाटै ल्याउने बताएका थिए । मुख्यमन्त्री विरुद्धको अविश्वास प्रस्ताव, सत्तापक्षकै अगुवाइमा संसद् अवरोध र बहिष्कारकाबीच हिउँदे अधिवेशनमा कुनै पनि विधेयक पारित हुन सकेन ।

प्रदेश १ संसद्बाट हालसम्म पाँच संशोधन ऐन, दुई संसद् नियमावलीसहित ५६ वटा विधेयक पारित भएको छ । प्रदेशको राजधानी टुंगो लागेपनि नामाकरणमा भने टुंगो लागेको छैन ।